Манай нютагай уран зохеолшо, поэт Жорж Долгорович Юбухаев

                                                                                         Эдлэһэн жэлнүүдни – жэлнүүдни

Энэ наһыем алталаашье, шабардаашье

                                                                              Эдир хаһын энгэртэ эжэлүдгүй

Эрид хурса оһолнууд дайралдаашье…..

       Поэдэй эдэ мүрнүүдые уншаһан хүн бүхэн заригад гэжэ, өөрынгөө хуби заяан тухай, ушарһан бэрхэшээлнүүд, һара жэлээр һанаан үнөөндэ абтаха гашуудалта үе, мүн баһа үхибүүн боложо собхормо, альгаа ташама, ташаганаса эльгэ хатама бахархал баяр тухайгаа заабол һанаандаа оруулха бэшэ гү? Эндэ поэт Жорж Юбухаев өөр тухайгаа бодомжолно гэжэ лаб мэдэнэбди, теэд маанадай сэдьхэлэй хүбшэргэйе дайража, өөрынгөө абъяас, нүлөөдэ абажа оруулна ха юм. Энэ хадаа поэзи, уран шүлэгэй шэди, доторой нюуса хүсэн гээшэл даа.

     Шүлэгтэй нүхэсэһэн наһан. Тэнгэреэр сүлөөтэйхэн ямаршье хүсэ гаргангүй элижэ ябаһан шубуун шэнгеэр һанагдадаг шүлэгшэдэй ажабайдал, һэдэлгэ, хүсэһэнөө хүсэлдүүлхэ хүдэлмэри тиимэшье хүнгэн бэшэ. Эндэ буурашагүй эрмэлзэл, нугаршагүй зориг, дундаршагүй дуран хэрэгтэй.

Наһанайш харгые дураар гоеожо,

Наранай туяа бэһэлиг зүүлгэхэб.

Һолонгоор торгон нэмэри нэхэжэ,

Һайхан шамаяа хубсалуулхаб.

       Тооро нютагайнгаа Зүүн Булан болохо «Камчатка» һууринда 1950 ондо түрбэлтэй Буряадай комсомолой шангай лауреат, Буряадай соелой габъяата ажаябуулагша, поэтическэ долоон согсолборинуудай автор, поэт Жорж Долгорович Юьухаев хадаа нимгэн зөөлэн сэдьхэлтэй лирик гэжэ тоологдохоороо тоологдоно. Тэрэнэй «Эхин», «Мүнгэн сэргэ», «Ута зам», «Шүлэгүүдни дүрбэн зүг, найман хизаарта», «Эрьен байһан юртэмсын юрьен соо», «Энхэрэл һайхан бодолнууд», «Ододой хөөрэлдөөн» гэһэн номуудынь дээрэ хэлээшые гэршэлнэ. Гадна поэдэй шүлэгүүд ород, монгол, узбек, туркмен, украин, тыва болон бусад хэлэнүүд дээрэ оршуулагдажа, тэндэхи уншагшадые хужарлуулһан түүхэтэй.

Наһанаймнай амгалан тайбан,

Нара, һараар сахяатай,

Элдин нютагаймнай тайлган,

Эхын найжаар тахяатай.

Найман зүгөө хүндэлэн,

Айлайм үбгэд тайлгална.

Хангай орондоо түшэглэн,

Арюун хэшэгынь хүндэлнэ.

       Жорж Юбухаев студент байхадаа, түрүүшынгээ номой гонорар түлбэреэр эжыгээ Москва, Ленинград абаашажа үзүүлһэн юм. Тиихэдэ Долгор Жалсановна эжынь: «Хүбүүмни, һайнши даа!»-гэжэ баяр хүргөө һэн. Наһа бараһан Баяр хүбүүнэйнгээ, Володя ахайнгаа мүнхэ дурасхаалда бэшэһэн мүрнүүдынь уншаад уярмаар, поэдтэй хамта уйдамаар.

       Жорж Долгорович гушаад жэлэй туршада Түнхэнэй Мүнхэ Сарьдагай нэрэмжэтэ литературна нэгэдэл урагшатай хүтэлбэрилөө. Тус нэгэдэлэй зүгһөө табан арадай уран зохеолшод тодорон гаранхай. Прозаигууд: Балдан Ябжанов, Ардан Ангархаев; поэдүүд: Шагдар Байминов,Лопсон Тапхаев, Баир Дугаров.

           Поэдэй зүрхэ сэдьхэл ганса сэсэгүүдэй дэльбэнүүд дээгүүр бэшэ, хүн түрэлтэнэй наһанай, хуби заяанай харгы дээгүүр, һэдэлгэ тээшэ, ами наһанай оршон тойрон байгаалиин нюусанууд тээшэ анхаралаа хандуулха зэргэтэй.

Теэд «таамаг энэ Дэлхэйн таабаринуудые тааха» хүсэл бии ха юм.

Урагшаа, урагшаа харгымни дэлгээтэй

Ушарһан хүшэр хүндые гаталхаб,-гэнэ ха юм поэт.

Ажал, жаргалай абъяас даагаад,

                                               Агуу замаа, наһаа саашань дахааб,- гэһэн еһоороо манай нютагһаа уг гарбалтай, оюун бэлигтэй поэт Жорж Юбухаев гэлигэр саарһан дээрэ халтиршагүй гуурһаараа поэзиин, журналистикын ажал хүсэн түгэлдэр ябуулһаар 60 наһанайнгаа дабаае дабан ябана.         (октябрь, 2013г)